سندھی ثقافتی دن ملک بھر میں خصوصاً سندھ کے مختلف شہروں میں روایتی جوش و جذبے کے ساتھ منایا گیا۔ اس موقع پر لوگوں نے سندھی اجرک اور ٹوپی پہن کر اپنی ثقافت سے محبت کا اظہار کیا۔ کراچی، حیدرآباد، سکھر اور لاڑکانہ میں ریلیاں نکالی گئیں اور ثقافتی پروگرام منعقد کیے گئے۔ تعلیمی اداروں میں خصوصی تقریبات کا اہتمام کیا گیا جہاں طلبہ نے سندھی شاعری، لوک گیت اور روایتی رقص پیش کیا۔ مقررین نے خطاب کرتے ہوئے کہا کہ ثقافتی دن منانے کا مقصد اپنی زبان، روایات اور تہذیب کو زندہ رکھنا ہے۔ اس دن نے بین الصوبائی ہم آہنگی اور قومی اتحاد کے پیغام کو بھی تقویت دی۔